बैंको से जुडी ये सभी बाते जरुर जानना चाहिए

10,158 total views, 0 views today

Rupiyo se mohabbat aur noton se aashiki, paisa kise pasand nahi hai? paise to aajkal sanso se bhi jyada jaroori hai, tabhi to sans liye bina na jane kitne log machine sarikhe rojana daftar jate hai aur suraj dhalte laut aate hai. khair ye unka nijee jeevan hai. apki har vitteey jaroorat ko poora karne vale bank ke baare me aap kitna jante hai? bank apki har chhoti badi jaroorat ka dhyan rakhta hai, to aapko bhi bank ke baare me kuchh bate to jaroor pata honi chahiye.

 

Bank account kisi ki bhi jindgi ka ek aham hissa hai. ab to sarkar ne bhi ise apki jindgi ke sath jodne ke liye kamar kas li hai. sarkar ne aisi kayi yojnaye banayi hai, jiska fayda uthane ke liye aapke pas bank account ka hona jaroori hai. sarkar ne jan dhan yojna jaisi yojna laakar garibo ko ek mauka bhi diya ki ve apna bank khata khulwa len, par jaisa ki deshvasiyo ki aadat hai, un khato me bhi jamakhoree ki kayi ghatnaye samne aayi. notebandi ke baad yah kaale karname saamane aaye. bank account kisi vyakti ke liye utna hee jaroori hai jitna ki paise.

aajkal bank bahut saree sevaye muhaiya karate hai. par bank ke mukhy roop se do hee kaam hote hai-

1. logo se paise lekar use surakshit rakhna aur jaroorat padne par jamakrta ko paise dena.

2. jarooratmand aur karj vapas karne ki kabiliyat rakhne wale logo ko uchit byaj par karj dena.

niymo ki reedh ki haddi par khade aur paiso ko nas nas bhare bank ka itihas bhi bada dilachasp hai. aap 500, 2000 aur itihaas ke panne me darj 1000 ke naklee noto ko to khoob pahachante honge. par kya aap banko ke baare me in anokhe pahaluon ko jante hai? padhiye banko se judi kuchh dilachasp bate-

 

1. vishv ka pahla bank

bebeelon, misr aur greece ke log banking se jude the. us jamaane me mandiro me log apne paise jama rakhte the. gauratlab hai ki Hindustan me log aaj bhi apane nijee paiso ki salamtee ke liye mandir me paise rakhte hai. bas vaapas mandir se paise vaapas nahi lete, aur patthar ki moorat ke liye lohe ki petee me dhan daulat bhar jaate hai.

par madhy kaal me karj lena paap ke samaan maana jaata tha. isliye kuchh desho ne banko ki asthapna par pratibandh bhi laga diya tha.

 

2. Bank shabd ki utpati

madhy kaal me karj lena gunaah tha. par jis par pabandi ho vo na kiya to kya kiya? Italy ke kuchh paise badalne valon ne apna business rasto par hee chalaana shuru kar diya. ye log bench par hee paise badalne ka karobar karte the. italivi me bench ko ‘banko’ kaha jaata hai. aur isee ‘banko’ se bank shabd aaya hai.

 

3. Duniya ka pahla bank

duniya ke pahle aadhunik bank, banco de rialto’ ki asthapna 16vi shatabdi me venis me ki gayi. es bank me cheque system bhi tha.

 

4. Hundee se hota tha paison ka aadaan-pradaan

bharat me bankon ne 18vi shatabdi ke ant me rookh kiya. usase pahle ‘hundee’ se paison ka aadaan-pradaan kiya jaata tha. hundee ek tarah ka mahajanee cheque ya haid not hai. yah ek aisa patr hai jo koi mahaajan kisi se kuchh karj lene ke samay uske praman swroop karj dene wale ko likhkar deta tha jis par dhan ko byaj samet chukane ka samay likha hota tha.

 

5. Bharat me banking ki shuruaat

bharat me banking ki shuruaat 18vi shatabdi ke ant me san 1786 me ‘the General Bank of india’ ki asthapna ke sath huyi. 1790 me ‘Bank of Hindustan’ ki asthapna ki gayi. gauratlab hai ki ab ye dono bank band ho chuke hai.

 

6. Bharatiyo ka pahla bank

1895 me lahore me Punjab national bank ki asthapna ki gayi. krantikari lala lajpat rai ne is bank ki asthapna ki thi. es bank ki baagdor poori tarah se bharatiyo ke hath me thi. vibhajan se pahle yah desh ka pahla bank tha, jise bharatiy hee chalate the. 122 saal purane is bank me aaj bhi kaam kaaj hota hai.

 

7. RBI ki asthapna

1935 me desh ke kendriya bank ke roop me RBI ki asthapna ki gayi. 1949 me RBI ka rashtriyakaran kiya gaya. Osborne Smith RBI ke pahle governor the. 1943 me C D Deshmukh ko pahla Indian  governor banaya gaya tha.

 

8. Chalan me the 5,000 aur 10,000 ke note

aaj 2000 ke noton ko lekar itna shor-sharaaba hai. ek taraf to log chhutte nahi dete aur doosri taraf chooran vale note bhi chhapne lage hai. par 1954-1978 ke beech 5,000 aur 10,000 ke note bhi chalan me the. aap aise noton ko desh ke sangrahaalayo me dekh sakte hai.

 

9. RBI nahi chhapta 1 rupiye ke note

RBI 2,5,10,20,50,100,500,2000 ke note chhapta hai par 1 rupiye ke note nahi chhapta. 1 rupiye ke note vitya mantralay dwara jaree kiye jaate hai jis par finance secretary ke hastakshar hote hai. isaki ek samaany vajah hai ki 1 rupiye ke note ko 1 rupiye ka sikka hi samajha jaata hai. 1934 ke rbi aikt ke tahat rbi sikke jaaree nahi kar sakta. aapko kisi bhi sikke par rbi ka nisan nahi dikhega.

 

10. Har note par bharat ki pahchan

agar aapne kabhi gaur kiya hoga to aapko har note par bharat ki ek pahchan dikhegi. bharat me rbi dvaara chhape gaye har note par kisi etihaasik imaarat, ya bharat ki kayi jagah ka chitr chhapa jaata hai. misaal ke taur par 500 ke nate note par red fort chhapaa hai vahi 20 rupiye ke note par andman deep ki tasveer chhapee gayi hai.

 

Note: es blog ko padhne ke bad aapke bank khate ka balance to nahi, par aapke gyan ke khate ka balance jaroor badh gaya hoga. aur agar aap bhi un khushkismato me se hai, jinhone bank ka account nahi khulvaya hai, to jara badkismti jhelkar bank ka account khulwa leejiye. phayda aapka hi hai.

admin

आपने कीमती समय देकर ब्लॉग पढ़ा धन्यबाद, ये पोस्ट आपको पसंद आया हो तो शेयर करना न भूले, ताकि इसे ज्यादा से ज्यादा लोग पढ़ें, अपना विचार जरूर लिखे, इससे हमें और ज्यादा अच्छी और लेटेस्ट जानकारियाँ लिखने के लिए प्रेरित करेगा.

Leave a Reply

Your email address will not be published.